Aopeningskoer.
(Harry
Verhagen)
Venlo viert vandaag weer fees:
Os dörp is stad gewaore!
Door zien groëte dapperheid
Is Venlo daoveur oetverkaore;
As 't hiële land bezweek,
Dan Woele wej nog vechte
Veur d' alde rechte
Van os jonge stad!
Hulde bringe wej de man,
Dae Stadsrech os kump gaeve;
Hulde Hertog Reinoud Twië,
Hae meuge mit zien vrouw lang laeve!
Det hae now os Stad bezuk,
Det gif weer nieje glorie
Aan de historie
Van os jonge Stad!
Venlo is Stad gewaore
Venlo waar os altied aeve trouw
En heel de ier van Gelder hoëg ten allen tied;
Börgerie voch dapper altied mei,
Al waar ouk dök hiël ongeliek de zwaore stried.
As zoë minnig ander stad bezweek,
As haos verlaore waar 't hiële land,
In den hoëgste noëd, as gen haop mier waar,
Heel Venlo toch nog dapper stand!
Ik zal och stadsrech gaeve
Veur och vaerder laeve,
Walle waere aangelag
En versterk oet alle mach.
Handel zal herlaeve,
Ik zal mien hölp och gaeve,
Zit gej now in noëd misschien,
Venlo zal groët ens zien!
Venlo zal floreere wie nog noeit,
Ein parel, jao, ein diamant aan Gelders kroën;
Sterk zal ouk dees nieje vesting zien,
Jao det is veur zien dapperheid 't beste loën.
As d'r taegespood ouk nog ens kump,
Dan draag dae mit 'ne lach op och gezich,
Want nog eeder kier, al waar groët 't leid,
Haet Venlo zich weer opgerich!
Sjuul kiek waal oet
Vuul minse hej in Venlo, die kniepen um hiël erg,
Wannierste die huurs klage, geit dich door bein en merg,
Ze dörve veur de Pruusse haos gaar neet mier op straot,
Ze kroepe in eur schuulplaats dan en weite genne raod.
Refrein:
Ik kiek waal oet, det ik mich zoë maar neet laot griepe,
Daoveur is Sjuul Tomaat gelökkig vuel teslum;
As ander minse veur de Pruussen 't um kniepe,
Dan loup ik hiël parmantig gauw en strötje um.
Ik heb 'nen Ausweis fyn van de Centrale Keuke,
En van de Luchbescherming en 't Roëje Kruuts,
Ik bin onmisbaar, want ik bin van de Ernährung,
Det heb ik eur al zeker honderd kier verduuts.
Waal zoel ik mich toch kwaele veur zonne fieze Mof,
Ik heb genog pepeere, heb altied nog gebof;
D'r kan dich niks gebeure mit ein of and're Schien,
Enne Pruus dae is now einmaol dom, en wilt belazerd zien
Refrein:
Wej slaon os door den oozel
haer!
Vol ellende is de waereld op vandaag,
Den oorlog zit eur in de maag, 't is treurig!
Maar wae now de mood luuet zakke in de schoon,
Dae is verkoch, dao 's niks mier aan te doon!
Refrein:
Wej slaon os door den oozel haer,
Make lol, make lol, lache mit os leid;
Waat ouk den daag van morge brink,
Des egaal, des egaal, as ouk de welt vergeit.
Wej zien gein moetsköp, doon neet aan greke,
Wej kieke lachend in 't rond, hahahaha!
Wej slaon os door den oozel haer
Mit en hertje lich, ein blie gezich, want lache is gezond!
Niks te aete is nog lang neet veur de poes,
Det mak dich waal en bietje koes, verdorie!
Maar zoëlang den eigen teelt in 't piepke stink,
Bezinge wej os leid nog det 't klink!
Refrein:
Waorum zoele wej neet lache mit os leid,
Al waas 't maar oet slummigheid, jao zeker!
Zumpe en gezichter snieje hölp os neet,
Det bringk allein nog maar wat mier verdreet!
Refrein:
't Leid van de Venlose
Maedjes
D'n oorlog dae brink os maedjes vuuel leid,
Wej zien toch werklik te beklage;
Umdet now de jonges op straot neet mage,
Zoëlang hej det Sjanse besteit.
Neemand dae os leid begriepe kan,
Dao zien wej ouk zoë mismeudig van......
Refrein:
Waat hebbe wej aan 't laeve,
't Kan os niks mier gaeve;
Os Jonges zien al maondelank gedaoke
Gen leef waord wuurd mier taege os gespraoke.
Wej waere alt van 't treure,
D'r mot toch iersdaags wat gebeure.
Wannier wej eindelijk nao den oorlog trouwe,
Dan zien wej al alde vrouwe!
D'r is gen toneel, neet ens ennen bal
Wao motte wej os amuseere?
De kans neet op taertjes dich ens trakteere,
Det is toch en dreuvig geval!
Bioscope zien d'r ouk al neet,
Niks waat kan verzaachte os verdreet......
Refrein:
De dörfs neet op straot vanwaeg 't gevaor
Granate vleege um dien oere
Den doëd steit doorluipend op dich te loere,
't Schaelt soms nog maar efkes ein haor!
't Lekker aete is ouk al gedaon,
Hiël os knap figuur geit nao de maon!
Refrein:
Standbeelde gevraog.
In 't Venloos Museum dao is 't zoë röstig,
Dao's alles verborge oet alden tied;
Vuel beuk en pepeere die waere bewaard dao,
Zoë kamp d'r tenminste niks van kwiet.
Ouk de groëte figure oet os historie
Zuut me zuchtende dao ronddwale wie enne geis;
Me kan dao neet praote, det is vervaelend,
Wej zien neet van hej, det kwaelt os 't meis.
Wej motte zoë now en dan ens d'r oet, ens op de loch,
Dan hebbe wej veur ennen tiedlank weer mood genog.
Gaon wej dan truuk nao os hukske onder 't stadhoes,
Och, dan veule wej os weer en bietje toes.
Wej komme oet Spanje, wej aarde hej neet,
Wej hebbe 't stadhoes hej vruuger gebouwd,
Oet dankbaarheid haet me, wie det is 't gebroek,
Os toen in daen donk're kelder gedouwd.
Eeder dae dao in dae kelder zit,
Dae is maar bang det me um vergit,
Hae wilt en standbeeld van zien naogeslach,
Dao haet hae vuel te lang al op gewach;
D'r zien in Venlo now pleine zat,
Meschien wuurd iirges en beeld gezat;
Dink dao ens aan as gej opbouwe got,
Alles waat is kepot,
Niks as plantsoene, det haet geine zin,
Zit dao en standbeeld in!
Ze kriege os neet kepot!
Waat d'r ouk is gebeurd,
Onmeug'lijk te beschrieve,
Venlo det blief bestaon,
Venlo zal Venlo blieve.
In 't letste oorlogsjaor
Trof os 't zwaorste lot;
Ze kinne waal doëd os make,
Maar ze kriege os neet kepot.
Venlo mot evacueere
Venlo mot evacueere
Is os leid nog neet genog?
Honger en keld hebbe os al bezoch,
Wej zien langzaam aan 't krepereere.
Och, waat mot det nog gaeve,
Zoë maar jueg me os weg;
Pruusse speule mit os laeve,
Waat kump van os terech?
Want onder waeg vreere wej meschien waal doëd!
Noeit ware wej nog in zonne groëte noëd!
Wej motte nao Friesland, wie me zaet,
Zelfs as me zien hoes vol kranke haet.
Al os bezit, waat zoë dierbaar os is,
Opgespaard in de loup van den tiëd,
Det zeen wej nimmer truuk,
Wej waere alles kwied!
Eederein wuurd now verdreve
Oet os half verwoeste stad.
Mitlieje haet enne Prus noeit gehad,
Maar det wuurd um aangeschreve!
Venlo motte verlaote,
Och, waat duit det toch pien!
Zumpend trekke door dien straote
Dien luu, die verbanne zien!
Dao zien ze!
Oh, give me land, lots of land under starry skies above:
Don't fence me in!
Let me ride thru the wide open country that I love Don't fence me in!
Wej zien vrej en wej lachen os now de mies,
't Laeve van de letste maonde waas ouk te gries!
Hiël os korpus is verdorie van de wies:
Gein vet mier in!
In eeder hoes
Vindste now gen ein petat mier, wieste ouk de zek umdreis:
En zelfs gen moes
Zuuste now nog loupe aste 's aoves nao de kelder geis.
Wej zien bevreid, en nog waal door de zwarte Yanks,
Wej zien verlos van 'ne groeten engs;
Oh, my dear friend, we say you many thanks!
Wej zien weer vrej!
Wej zien weer vrej!
De Pruus is verdwene! De Yanks zien gekomme!
Gelökkig, now zien we weer vrej!
Now is al os leid weer hiël gauw vergaete,
Wej zien vief jaor lank door en hel gegaon
Wej hebbe hiël wat oozel hej verdeurd,
En 't letste jaor waar 't ergs van al,
Maar now is 't toch Goddank gebeurd!
Want we zien bevrejd, jao we zien weer vrej!
Now gaon we weer mit mood de toekoms in,
Wej verloore vuel, zien haos alles kwiet,
Maar wej heele toch ooze gooie zin!
Os stad lete in puine! Os huzer geplunderd!
Det haet um de Pruus os gelap!
En wie wej truuk kwame oet 't hoëge Noorde,
Toen waas ouk de res nog gegap!
Maar now zien we vrej, alles kump terech,
Wej komme d'r weer lanksaam baovenop.
Leid vergit zich gauw, en det is maar good,
Anders ware wej te zier gefop!
Halt de mood d'r in, kiek neet achter och,
't Ergste is in elk geval veurbej;
De verbaetering zal waal lanksaam gaon,
't Veurnaamste is: We zien weer vrej!
Wej Bouwe Venlo op!
Staek de hand now oet de mouw,
Manne vrouwe al!
Det os gooie alde stad
Gauw herrieze zal!
As hej flink wuurd aangepak,
Det is al de helf.
As os neemes anders hölp,
Helpe wej os zelf!
Venlo, stedje van plezeer aan de Maas,
Wej bouwe dich weer op,
Moëjer dan deste einmaol waas,
Wej bouwe , Venlo op!
Venlo, waat me dich ouk aan haet gedaon,
Wej bouwe dich weer op,
Laat os neet blieve treure,
Wej bouwe Venlo op!
